એક ભીના સ્પર્શથી દાઝ્યા છીએ

એક ભીના સ્પર્શથી દાઝ્યા છીએ,

રોમ રોમે હર્ષથી દાઝ્યા છીએ.

કોણ જાણે કેટલા વર્ષો થયાં!

કેટલાંયે વર્ષથી દાઝ્યા છીએ.

કોડિયામાંથી ગયા બસ વાટમાં,

એટલા ઉત્કર્ષથી દાઝ્યા છીએ.

આ સતત ઘર્ષણ થવાના કારણે,

આપણે સંઘર્ષથી દાઝ્યા છીએ.

સાવ અધકચરું અનુસરતા રહ્યા,

એટલે આદર્શથી દાઝ્યા છીએ.

છત હવે ઝાઝું ટકે એવી નથી,

ને અમે આ ફર્શથી દાઝ્યા છીએ.

ek bhina sparsh thi dajhya chhiye