સવાયા શબ્દનો સ્વસ્તિક કરીને મૌન થઈ જાઉં

સવાયા શબ્દનો સ્વસ્તિક કરીને મૌન થઈ જાઉં,

મને આવડતા બે ટહુકા ધરીને મૌન થઈ જાઉં.

બધે અંધારપટ છે લાગણીનો – જાણું છું, તો પણ,

હું કોઈ આગિયા શો સંચરીને મૌન થઈ જાઉં.

નથી ઊંચકી શકાતો ભાર ભાવુકતાનો ભાષાથી,

નજરથી વાત કહું, તુર્ત જ કરીને મૌન થઈ જાઉં.

અવાજો પર્ણને નહિ, બસ પવનને હોય છે અહીંયા,

સતત થાતું મને : હું પણ ખરીને મૌન થઈ જાઉં.

ઘણીયે વાત બાકી છે, જરા શી રાત બાકી છે,

અધૂરી વાત પાછી આદરીને મૌન થઈ જાઉં.

ઉઘાડ્યા હોઠ એને ના સમય ઝાઝો થયો તો યે,

હવે લાગ્યા કરે છે કે ફરીને મૌન થઈ જાઉં.

sawaya shabdno swastik karine maun thai jaun