રેખ્તા
હિન્દવી
સૂફીનામા
રાજસ્થાની
પત્રમાં ચોમાસું
patrman chomasun
કરસનદાસ લુહાર
કરસનદાસ લુહાર
એક લીલા પાંદ પર તેં વહાલ વરસાવ્યું હશે!
એ પછી આંગણ સુધી જંગલ ધસી આવ્યું હશે!
આંહીનો અન્ધાર મારો સૌમ્ય, હરિયાળો થયો;
તુલસી-ક્યારે કોડિયું તેં હમણા પ્રગટાવ્યું હશે!
જે જગાથી આપણે લઈને તરસ છૂટાં પડ્યાં;
એ જગા જોવા પછી કોઈ ઝરણ આવ્યું હશે!
ચાર અક્ષર જેટલું અંતર સહેવાયું નહીં;
એટલે તેં છૂંદણાંમાં નામ ત્રોફાવ્યું હશે!
મારું નિર્જળ શહેર આખું પાણીપાણી છે હવે!
પત્રમાં સરિયામ ચોમાસું તેં ચીતરાવ્યું હશે!
સ્રોત
- પુસ્તક : ગુજરાતી કવિતાચયન 2002 (પૃષ્ઠ ક્રમાંક 14)
- સંપાદક : રમણીક સોમેશ્વર
- પ્રકાશક : ગુજરાતી સાહિત્ય પરિષદ
- વર્ષ : 2004