રેખ્તા
હિન્દવી
સૂફીનામા
રાજસ્થાની
મારો અભાવ
maro abhaw
મનોજ ખંડેરિયા
મનોજ ખંડેરિયા
લાલાશ આખા ઘરની હવામાં ભરી જઈશ
ગુલમ્હોર મારી લાગણીનો પાથરી જઈશ
ઊડતાં ફૂલોની કલ્પનાને સાચી પાડવા
આપી મહક પતંગિયાને હું ખરી જઈશ
આખુંય વન મહેકતું રહેશે પછી સદા
વૃક્ષોનાં થડમાં નામ લીલું કોતરી જઈશ
હું તો છું પીછું કાળના પંખીની પાંખનું
સ્પર્શું છું આજ આભને, કાલે ખરી જઈશ
મારો અભાવ મોરની માફક ટહુકશે
ઘેરાશે વાદળો અને હું સાંભરી જઈશ
સ્રોત
- પુસ્તક : વરસોનાં વરસ લાગે (પૃષ્ઠ ક્રમાંક 34)
- સર્જક : મનોજ ખંડેરિયા
- પ્રકાશક : નવભારત સાહિત્ય મંદિર
- વર્ષ : 2011
- આવૃત્તિ : પુનર્મુદ્રણ