રેખ્તા
હિન્દવી
સૂફીનામા
રાજસ્થાની
પગલાં તળાવમાં
pagla talavmaa
અશોક ચાવડા 'બેદિલ'
અશોક ચાવડા 'બેદિલ'
થીજી ગયું છે એય પણ તારા અભાવમાં;
લોહી હવે વ્હેતું નથી એકેય ઘાવમાં.
કાંઠાઓ રોઈ રોઈને જળને પૂછી રહ્યા :
ભૂલી ગયું છે કોણ આ પગલાં તળાવમાં?
બત્રીસ ગુણની લાગણીનો ભોગ દઈ દીધો,
છલકાયું ત્યારે નીર આ આંખોની વાવમાં.
મંદિર વચોવચ એક માણસની થઈ કતલ,
ઈશ્વર છતાં આવ્યો નહીં એના બચાવમાં.
‘બેદિલ’ અરીસો આટલું કહીને ફૂટી ગયો,
મારાપણાની છે ઊણપ મારા સ્વભાવમાં.
(૧૨-૧૦-૨૦૦૦)
સ્રોત
- પુસ્તક : પગલાં તળાવમાં (પૃષ્ઠ ક્રમાંક 11)
- સર્જક : અશોક ચાવડા ‘બેદિલ’
- પ્રકાશક : રન્નાદે પ્રકાશન
- વર્ષ : 2012