રેખ્તા
હિન્દવી
સૂફીનામા
રાજસ્થાની
ક્યાંક પડછાયો પડે છે, ક્યાંક ઊભો દેહ દ્રઢ
હું મને હંમેશ કહેતો : આવ સામે, ચાલ લઢ.
અંધકારે બંધ મુઠ્ઠીમાં ચણોઠી રાખીને
ઓ પ્રવાસીજીવ મારા! ચાલવાની છોડ રઢ.
એક લીલાઝાડ પર તૂટી પડેલી વીજળી!
હું હજી જીવી રહ્યો છું, જા, ફરી આકાશ ચઢ.
બાતમી મળતી નથી લેબાસ બદલાયા પછી
સાત જન્મોની કથાનો હું જ નાયક, નામ : ઢ.
પાણી, ખારાં પાણી છે, એનો ભરોસો ક્યાં કર્યો?
એય આંખોનાં સગાં છે, તોડશે ઇર્શાદગઢ.
(જાન્યુ. '78)
સ્રોત
- પુસ્તક : ઇર્શાદ (પૃષ્ઠ ક્રમાંક 50)
- સર્જક : ચિનુ મોદી
- પ્રકાશક : રન્નાદે પ્રકાશન
- વર્ષ : 2012