રેખ્તા
હિન્દવી
સૂફીનામા
રાજસ્થાની
હાય શરમ
hay sharam
શેખાદમ આબુવાલા
શેખાદમ આબુવાલા
એક પણ શબ્દ ન મુખમાંથી સર્યો હાય શરમ
આંખ ઢાળી ને મને જામ ધર્યો હાય શરમ
રૂપનો લ્હેરતો સાગર ને નિચોવાતું દિલ
પ્રેમમાં હું તો ન જીવ્યો કે મર્યો હાય શરમ
કોઈ ક્હેતું હતું ઘૂંઘટને ખસેડી હળવે
નીચી નજરે મને બેચેન કર્યો હાય શરમ
ધ્રૂજતા હાથે ઉતાવળ આ કરી છે ભારે
હાર કોનો હતો ને કોને વર્યો હાય શરમ
રૂપનો ચોર કહ્યો સાંભળી ચુપચાપ રહ્યો
હું તો દિલ આપીને પણ ચોર ઠર્યો હાય શરમ
અંગુલિ સ્હેજ અડી – વીજળી જાણે કે પડી
શો ફરેબી હતો એ ક્રોધ નર્યો હાય શરમ
એના પડછાયામાં જ્યાં મારો સર્યો પડછાયો
હાથ છોડીને મને દૂર કર્યો હાય શરમ
સ્રોત
- પુસ્તક : દીવાન-એ-આદમ (પૃષ્ઠ ક્રમાંક 78)
- સર્જક : શેખાદમ આબુવાલા
- પ્રકાશક : નવભારત સાહિત્ય મંદિર
- વર્ષ : 1992