પાનખર પગલાં ભરે ઘડિયાળમાં

પાનખર પગલાં ભરે ઘડિયાળમાં

પાંદડાં ટન ટન ખરે ઘડિયાળમાં

દાબી દૈ બે હાથમાં ટક ટક અવાજ

મૌનને કહો વિસ્તરે ઘડિયાળમાં

લાગણી લોલક ઉપર સરક્યા કરે

આંગણું સૂનું તરે ઘડિયાળમાં

ચીરતા કાંટા પળોના દેહને

કેટલું લોહી ઝરે ઘડિયાળમાં

આંકડા વાગોળ થઈ ઊડી જતા

રાત જ્યારે ઘર કરે ઘડિયાળમાં

ટેકવી કાંટા ઉપર મસ્તક સમય

રાતભર જાગ્યા કરે ઘડિયાળમાં

paankhar paglaan bhare ghadiyaalmaan