નિર્મળ નયન નથી ને નરી વાસના નથી

નિર્મળ નયન નથી ને નરી વાસના નથી,

જેનો નજીક અંત હો એવી કથા નથી.

દિલ ખોલ આ મુકામે ભલે સંકલન ન હો,

તાજુબ બધા થયા છે, છતાં વાહવા નથી.

શરણાગતિનો અર્થ ન જાણું – સ્વીકાર કર,

મારી હયાતી છે, આ કોઈ હા કે ના નથી.

આ મારા હાસ્ય પર હું રડું નૈં તો શું કરું?

એ પણ હવે કહે છે મને કૈં વ્યથા નથી.

મોકો છે, લ્યો નિશાન બરાબરનું મર્મ પર,

થોડો ઉદાસ છું અને માફક હવા નથી.

nirmal nayan nathii ne narii vaasnaa nathii