નામ લેતાં એનું અટકી જાય છે, બોલો

નામ લેતાં એનું અટકી જાય છે, બોલો.

એક પાગલને બધું સમજાય છે, બોલો.

ઈશ્વરે એ ગામ છોડ્યાને થયાં વરસો,

ત્યાં પૂજારીઓ હવે પૂજાય છે, બોલો.

આમ વરસોથી નથી ઊંઘ્યો હકીકત છે,

આમ એ સપના સમો દેખાય છે, બોલો.

કોઈ દરજી માપ લઈ શકતો નથી એનું,

એ સતત નાનો ને મોટો થાય છે, બોલો.

દર વખત લો, લક્ષ્ય પોતે તાળીઓ પાડે,

જેટલી પણ વાર એ વીંધાય છે, બોલો.

એ બધાથી સાવ નોખો ને અલગ તોપણ,

એકસરખો સર્વમાં વ્હેંચાય છે, બોલો.

nam letan enun atki jay chhe, bolo