અર્પણ કરીને એક ઈતર છીનવી લીધું

અર્પણ કરીને એક ઇતર છીનવી લીધું,

આપી દીધું શરીર ભીતર છીનવી લીધું.

ડંકા, છડી, નિશાન, ચમર ત્યાગવા હતા,

પણ છોડવું નહોતું છતર, છીનવી લીધું.

આપી રજા મહેલમાં વસવાટની ફક્ત,

નાતો હતો અતૂટ એ ઘર છીનવી લીધું.

એકાદ વ્યક્તિ ઝૂંટવ્યે સંતોષ ના થયો,

મારી કનેથી આખું નગર છીનવી લીધું.

દેવા ચહ્યું'તું એણે તો સઘળું દીધું હતું,

અફસોસ ક્યાં એણે જ અગર છીનવી લીધું.

મારા ગુનાને લીધે અલગ તો કરી દીધા,

મળવું સખીના વાંક વગર છીનવી લીધું.

ખંડિત મૂર્તિઓ ને દીવાલોને શું કરું?

'ફાની' ધજા સમેત શિખર છીનવી લીધું.

Arpan Karine Ek Itar Chhinavi Lidhu