રેખ્તા
હિન્દવી
સૂફીનામા
રાજસ્થાની
નદી
nadi
જિતુ ત્રિવેદી
જિતુ ત્રિવેદી
ન જળ હોય તો શું, નદી એ નદી છે;
સ્મરણમાં સુકાતી નથી એ નદી છે.
નિશાળે ભણાવાતા નકશામાં જોજો,
અહીં જે નથી, ત્યાં હજી એ નદી છે.
પ્રદૂષણના ધુબકા સહન થઈ શક્યા નહિ,
તો રેતી નીચે જઈ વસી એ નદી છે.
નજર સહેજ ફેંકી, ભીનાં વાદળોએ
ને રેતીને જે કળ વળી એ નદી છે.
નજર સામે વસ્તીની વસ્તી ડૂબી ગઈ;
નજરમાં જે કેવળ બચી એ નદી છે.
પડ્યો જ્યાં હું તરવા તો જાણ્યું કે આ તો
જે મારામાં તરતી હતી એ નદી છે!
વટી બેય કાંઠા એ વહેતી'તી કિન્તુ,
મને તારવા ઓસરી એ નદી છે.
સ્રોત
- પુસ્તક : ગુજરાતી કવિતાચયન 2009 (પૃષ્ઠ ક્રમાંક 18)
- સંપાદક : રાજેશ પંડ્યા
- પ્રકાશક : ગુજરાતી સાહિત્ય પરિષદ
- વર્ષ : 2012