રેખ્તા
હિન્દવી
સૂફીનામા
રાજસ્થાની
વરસ
waras
જમિયત પંડ્યા 'જિગર'
જમિયત પંડ્યા 'જિગર'
વરસ–વરસ હવે વાદળ! તું ધોધમાર વરસ,
બળે છે આગ હૃદયમાં, મને તું ઠાર, વરસ!
હવે એ આવી રહ્યાં, આંખ! ઝારઝાર વરસ,
વીતી રહ્યાં છે એક રાતમાં હજાર વરસ.
નથી આ બાગ, મહારણ ન થાય હરિયાળું,
પછી એ મેઘ! વાત તારે અખ્તિયાર, વરસ!
પુરાણી યાદ છે, ઝરણું વહે છે, બેઠો છું;
વહી રહ્યું છે ગમગીનીભર્યું અસાર વરસ.
હજી ય યાદ છે, માઝા મૂકીને વરસી'તી,
ફરી ઓ કાળી ઘટા! આવ, એક વાર વરસ;
જરાક તારી ગમગીનીની આબરૂ રહી જાય;
‘જિગર’! તું બેકરાર છે તો બેશુમાર વરસ!
સ્રોત
- પુસ્તક : માઈક્રોવેવ (પૃષ્ઠ ક્રમાંક 37)
- સંપાદક : મુકુન્દ જોશી, સુલભ ધંધુકિયા, આતિશ પાલનપુરી
- પ્રકાશક : ગઝલ સાહિત્ય વર્તુળ પ્રકાશન
- વર્ષ : 1987