રેખ્તા
હિન્દવી
સૂફીનામા
રાજસ્થાની
મારા ઉજાસને
mara ujasne
કરસનદાસ લુહાર
કરસનદાસ લુહાર
શિક્ષા કરું શી મારા ગુનેગાર શ્વાસને?
ના પી શક્યા એ કોઈ ફૂલોની સુવાસને!
પગમાંથી ઉખેડ્યું તો એ નખમાં ઊગી ગયું!
નિર્મૂળ કરવા તોય મથું છું હું ઘાસને!
ઝાંખી પડી ગયેલ દિશાઓને ધોળવા -
વાતાવરણ લઈ ગયું મારા ઉજાસને!
નિર્વસ્ત્ર લાશ પર નર્યું ઝાકળનું આવરણ-
જોઈને ફૂટતાં રહ્યાં કાલાં, કપાસને!
ઝળહળતા કોઈ શ્વાસ બુઝાઈ ગયા છતાં -
અંધારનું ન ભાન થયું આસપાસને!
એના ઉપર ઊગ્યું છે ઝીણું જળનું ઝાડવું;
દાટી દીધી મેં રેતમાં જ્યાં મારી પ્યાસને!
સ્રોત
- પુસ્તક : ગઝલશતક (પૃષ્ઠ ક્રમાંક 13)
- સંપાદક : હર્ષદ ત્રિવેદી
- પ્રકાશક : ગુજરાત સાહિત્ય અકાદમી
- વર્ષ : 1999