મારા મહીં સમાયેલા એ જણ વિશે ન પૂછ

મારા મહીં સમાયેલા એ જણ વિશે ન પૂછ

બીજું બધુંય પૂછ પણ એ પણ વિશે ન પૂછ

મારી ગઝલની સાથે હશે કૈં ઋણાનુબંધ

પણ મારા એની સાથેના સગપણ વિશે ન પૂછ

માટીની જેમ હુંય સુંગધાઈ ગયો'તો

વરસ્યો'તો ધોધમાર એ શ્રાવણ વિશે ન પૂછ

લોહીલુહાણ કેમ છે આ મારા વર્તમાન

સદીઓ વીતી ગઈ હવે આ ક્ષણ વિશે ન પૂછ

ઓગળતી સાંજે દોસ્ત! કોઈ પ્રશ્ન કર નહીં

તું પણ સુરામાં ડૂબ ને મારણ વિશે ન પૂછ

કાગળમાં ચીતરાયેલી પીડાના સમ હનીફ

મારી ગઝલમાં આવતા એ જણ વિશે ન પૂછ

mara mahin samayela e jan wishe na poochh