મનની અગાસી

મનની અગાસી

છેવટે મનગમતી ક્ષણ ગઈ ક્યાંક નાસી

ડૂસકાં ભરતી રહી મનની અગાસી.

પથ્થરો પર મેં પછાડી હોત એને

કાચની માફક તૂટે છે ક્યાં ઉદાસી?

ચંદ્રની બસ શોધમાં ભટક્યા કર્યું મેં

રાત કેવી નીકળી સઘળી અમાસી!

કેટલી ભારે સજા કીધી મને તેં

આપીને અટકળ; ક્ષણો ને આંખ પ્યાસી.

થઈ ગયો આ તો નિયમ હંમેશનો કે-

યાદ તારી ફૂલ જાણે બારમાસી.

કૈંક બળતું : હા ભીતર બળતું પળેપળ

વેદના તાજી જ છે; છે ઘાવ વાસી.

મારી આંખોમાં લખ્યા છે મૌન શબ્દો

વાંચ! જોયા શું કરે છે મોં વકાસી?

mannii agasii