મહેફિલની ત્યારે સાચી શરૂઆત થઈ હશે

મહેફિલની ત્યારે સાચી શરૂઆત થઈ હશે,

મારા ગયા પછી જ મારી વાત થઈ હશે.

ઢળતા સૂરજને જોઉં છું જોયા કરું છું હું,

લાગે છે એના શહેરમાંયે રાત થઈ હશે.

આજે હવામાં ભાર છે ફૂલોની મહેકનો,

રસ્તાની વચ્ચે એની મુલાકાત થઈ હશે.

મારે સજાનું દુઃખ નથી છે દુઃખ એ વાતનું,

વાતો થશે કે મારે કબૂલાત થઈ હશે.

લોકો કહે છે ભીંત છે બસ ભીંત છે ફક્ત,

“કૈલાસ” મારા ઘર વિષેની વાત થઈ હશે.

mahephilni tyare sachi sharuat thai hashe