રેખ્તા
હિન્દવી
સૂફીનામા
રાજસ્થાની
મહાપ્રલય
mahapralay
નિનુ મઝુમદાર
નિનુ મઝુમદાર
જરા થોભજે! આંસુ નયને ભરી લઉં,
પછી સર્વ દુનિયા ડુબાવી તું દેજે;
કહેવાય જેને મહોબત કરી લઉં,
પછી સર્વ દુનિયા ડુબાવી તું દેજે.
અરે! આશ-ઝરણાં વહીને બન્યો છે
નિરાશા તણો સિંધુ મોટો અનોખો;
હું પોતા તણા આ પ્રલયને તરી લઉં,
પછી સર્વ દુનિયા ડુબાવી તું દેજે.
હૃદય તારું છોડી નથી ક્યાંય જોતો,
જગ્યા એક કોરી મહા પ્રેમપૂરે;
બચેલા કિનારે હું ધીરજ ધરી લઉં,
પછી સર્વ દુનિયા ડુબાવી તું દેજે.
ભીંજાઈ રગેરગ, ભીંજાઈ તમન્ના,
ભીંજાયો છું સર્વત્ર જીવન-ઉછાળે;
સકળ રોમરોમે જરા થરથરી લઉં,
પછી સર્વ દુનિયા ડુબાવી તું દેજે.
સ્રોત
- પુસ્તક : મધુવન (પૃષ્ઠ ક્રમાંક 139)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન, રાજકોટ
- વર્ષ : 2002
- આવૃત્તિ : 4