રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
આશાનું, ઇન્તેઝારનું, સપનાનું શું થશે?
તું આવશે તો મારી આ દુનિયાનું શું થશે?
આ ઝાંઝવાંથી એક ગતિશીલતા તો છે,
મળશે ઝરણ જો માર્ગમાં પ્યાસાનું શું થશે?
દુઃખ પર હસી તો દઉં છું મગર પ્રશ્ન થાય છે,
જે દોસ્ત દઈ ગયા એ દિલાસાનું શું થશે?
હું એ ફિકર કરીને ભટકતો રહ્યો સદા,
મંઝિલ મળી જશે પછી રસ્તાનું શું થશે?
ખીલે છે ફૂલ તોય રુદન છે તુષારનું,
કરમાશે ફૂલ ત્યારે બગીચાનું શું થશે?
ચમકે ન મારું ભાગ્ય ભલે કિન્તુ ઓ ખુદા,
તારા ગગનના કોઈ સિતારાનું શું થશે?
અત્યારથી જ મારી ફિકરમાં સુકાય છે,
હું જો ડૂબી જઈશ તો દરિયાનું શું થશે?
આ મયકદાનું એટલું તો અમને ભાન છે,
નહિ આવશું અમે તો મદિરાનું શું થશે?
‘બેફામ’ એટલે તો નિરાંતે ઊંઘી જશું,
જીવવાનું દુઃખ જ્યાં થાય ત્યાં મરવાનું શું થશે?
સ્રોત
- પુસ્તક : કેટલું થાકી જવું પડ્યું...(ચૂંટેલી ગઝલો) (પૃષ્ઠ ક્રમાંક 60)
- સંપાદક : ડૉ. એસ. એસ. રાહી
- પ્રકાશક : ગુજરાતી સાહિત્ય અકાદમી, ગાંધીનગર
- વર્ષ : 2022