મારા સમ સોનલવરણું છે

મારા સમ સોનલવરણું છે,

હૈયું કસ્તુરી હરણું છે.

તમ શમણું મારું શરણું છે,

ભવરણમાં મીઠું ઝરણું છે.

કેમ ન લાગે વ્હાલું શમણું!

સ્નેહ-જીવનનું સાંભરણું છે.

આવો, બિરાજે આવો હૃદયમાં!

રૂપને લાયક પાથરણું છે.

જીવન કંઈ સળગી ના જાએ,

જોબન જ્વાલાનું ઝરણું છે.

લોક કહે છે જીવન જેને,

ચાર દિવસનું ચાંદરણું છે.

ડૂબતાનો છે એક સહારો,

છો દેખાવે મન તરણું છે.

સંસ્કારોમાં કાંઈ રહ્યું ના!

ઉપવીત છે ના ઉપરણું છે.

કેમ જવાની શોક ન પાળે!

'ઘાયલ' જેવાનું મરણું છે.

maaraa sam sonalvarnu chhe