ક્ષણોની ઊડતી ચકલી...

સમયના નામની તકતી અમારા નામની આગળ રહે છે કાયમી,

ક્ષણોની ઊડતી ચકલી અમારા નામની આગળ રહે છે કાયમી.

કદી ડાળી, કદી પત્તા, કદી બસ થડ તણા હુંકારને ભીતર ભરી,

કહો કે વૃક્ષની મરજી અમારા નામની આગળ રહે છે કાયમી.

અમારી નામના ચારે તરફ વાગી જશે, ખખડી જશે ડંકો હવે;

પીટેલા ઢોલની ગરમી અમારા નામની આગળ રહે છે કાયમી.

ક્ષણોને લૂંટતો, લૂંટાવતો ચાલ્યો ગયો એ તાનમાં ને તાનમાં;

કહો : કે કોણ અક્કરમી અમારા નામની આગળ રહે છે કાયમી?

લખી છે વાત મેં તારા સબબ, કેવળ અને કેવળ હવે તારા સબબ;

છતાં એ વાતની ભરતી અમારા નામની આગળ રહે છે કાયમી.

kshnoni uDti chakli