કોઈનાં ભીનાં પગલાં થાશે એવો એક વર્તારો

કોઈનાં ભીનાં પગલાં થાશે એવો એક વર્તારો છે

સ્મિત ને આંસુ બન્નેમાંથી જોઈએ કોનો વારો છે.

મારા લગતી કોઈએ બાબત એમાં તો મેં જોઈ નહીં

જીવું છું પણ લાગે છે કે બીજાનો જન્મારો છે.

એ જ વખત બસ હોય છે એનું પૂરતું ધ્યાન અમારા પર

એટલે અમને એના કરતાં એનો ગુસ્સો પ્યારો છે.

મારી સામે કેમ જુએ છે મિત્રો શંકાશીલ બની,

જ્યારથી હસવા લાગ્યો છું બસ ત્યારથી આ મુંઝારો છે!

કોઈ તો એવી રાત હો જ્યારે મરજી મુજબ જાગી લઉં

કોઈ તો એવો દિવસ હો કે લાગે દિવસ સારો છે.

Koina Bhina Pagla Thashe Evo Ek Vartaro