ખાલી ખોંખારાથી વટ કેવો પડે

ખાલી ખોંખારાથી વટ કેવો પડે?

ઝેર કાઢેલા સરપ જેવો પડે.

મૂલ્ય સાચાં જો સમજવાં હોય તો,

શૂન્યનો આધાર પણ લેવો પડે.

ખાંખાંખોળા કર નહીં કાંઠા ઉપર,

મોતી લેવા ધૂબકો દેવો પડે.

જિંદગી સૌની છે રામાયણ સમી,

ક્યાં હવે વનવાસને સ્હેવો પડે!

હોય ના પડછાયો જુદી રીતનો,

આપણે જેવા હશું, એવો પડે.

ગત જનમનો રહી ગયો બાકી હશે,

આ ભવે એ દાવ તો દેવો પડે.

khaalii khonkhaaraathii vat kevo pade