કરી કરીને તમે કેટલું કરી શકશો

કરી કરીને તમે કેટલું કરી શકશો

ને આંસુઓથી સરોવરને શું ભરી શકશો

આ ભૂંડી ભાષાના અર્થોને ચાતરી શકશો

કોઈના શબ્દનો વિશ્વાસ પણ કરી શકશો

તમારા હાથ બહુ લાંબા છે કબૂલ છતાં

તે ચીર માતાનાં જાતે જ શું હરી શકશો

હવે તો ઘૂઘવે ચોમેર લોહીનો દરિયો

અમે તો ડૂબ્યા પરંતુ તમે તરી શકશો

ટકોરા મારશે યમરાજ બારણે આવી

સવાલ એટલો છે આપ કરગરી શકશો

કોઈના અસ્થિના અવશેષ નીકળ્યા કરશે

તે ઊંડે ક્યાં સુધી ઘરતીને ખોતરી શકશો

બધાય કાંઠા તણાઈ ગયા છે પાણીમાં

વહાણ આપનું ક્યાં? કેમ? લાંગરી શકશો

અસંખ્ય માણસોને જીવતા જલાવાયા

આ વાત કેવી રીતે આપ વિસ્મરી શકશો

સમુદ્ર સામે ને યમની સવારી હો પૂંઠે

પછી તો કેમ કરી પાછાયે ફરી શકશો

હવે તો બીજું કોઈ છેતરાય ના આદિલ

હવે તો જાતને જાતે જ છેતરી શકશો

kari karine tame ketalun kari shaksho