રેખ્તા
હિન્દવી
સૂફીનામા
રાજસ્થાની
કપાસમાં
kapasman
અમિત વ્યાસ
અમિત વ્યાસ
તારા વિશે જે નીકળ્યાં ઊંડી તપાસમાં,
તેઓ બધાં જ હોય છે કાયમ પ્રવાસમાં!
સાંઈ! તમે જ કંઈક કહો તાંતણા વિશે;
લોકો તો ગૂંચવાઈ ગયા છે, કપાસમાં!
જ્યારે સ્વયમના તેજથી અંધાર ઓગળે;
ત્યારે ફરક રહે નહીં પૂનમ-અમાસમાં!
તારા વિરુદ્ધ કાન ભરે છે અનેકના;
એનોય હાથ હોય છે, તારા વિકાસમાં!
ઝોલે ચડી છે રાજકુમારીની વારતા;
ગોખે થરકતા એક દીવાના ઉજાસમાં!
સેવી શકે, તો સંતની કોટિને પામશે;
જે શબ્દ વેડફે છે તું વાણી-વિલાસમાં!
સ્રોત
- પુસ્તક : નાજુક ક્ષણો (પૃષ્ઠ ક્રમાંક 76)
- સર્જક : અમિત વ્યાસ
- પ્રકાશક : પોતે
- વર્ષ : 2002