રેખ્તા
હિન્દવી
સૂફીનામા
રાજસ્થાની
કંડારવી છે
kandaarvii chhe
હાર્દિક વ્યાસ
હાર્દિક વ્યાસ
આંગળીઓ હોઠ ભીંસી વાળવી છે.
હસ્તરેખાઓ નવી કંડારવી છે.
આપણે પહોંચી ગયા સામા કિનારે,
ક્યાં સુધી આ હોડીઓ હંકારવી છે?
આ બધું પામ્યા પછી પળ કઈ હશે?
– એટલી સમજણ પછી વિકસાવવી છે!
એ અગાસી પર જઈ નક્કી કરે છે,
કેટલી કોની પતંગો કાપવી છે?
ભેદ ના હો કોઈ દૃષ્ટિ-દૃશ્યમાં પણ;
એટલી સીમા હજી ઓળંગવી છે!
હું રહું ના હું અને ના તું રહે તું
જાતને એવી રીતે ઓગાળવી છે!
વ્હાલથી છૂટું પડે ઓવારણું તો,
માનથી એની પ્રથાને પાળવી છે…!
સ્રોત
- પુસ્તક : શિખર વહે, ધજા વહે... (પૃષ્ઠ ક્રમાંક 13)
- સર્જક : હાર્દિક વ્યાસ
- પ્રકાશક : ઝેન ઓપસ
- વર્ષ : 2024