કાંટાના ડંખ સાથ છે ફૂલોનું ઝેર પણ—

કાંટાના ડંખ સાથ છે ફૂલોનું ઝેર પણ—

વાળે છે શું વસંત ગયા ભવનું વેર પણ?

તણખા છે સંસ્કૃતિના, કળિયુગનો વાયરો,

જંગલની જેમ ભડકે બળે છે શહેર પણ.

દૃષ્ટિની સાથ સાથ પડળ પણ છે આંખમાં,

જ્યોતિની ગોદમાં છે તિમિરનો ઉછેર પણ.

આવ્યા, તમાશો જોયો અને લીન થઈ ગયા,

ભૂલી ગયા કે પાછા જવાનું છે ઘેર પણ.

શંકર બધું જ પી ન શક્યા શૂન્ય એટલે

આવ્યું છે વારસામાં અમારે આ ઝેર પણ.

kaantaanaa dankh saath chhe phuulonun jher pan