જિન્દગીને એ રીતે પણ જીવી લેતા હોય છે

જિન્દગીને એ રીતે પણ જીવી લેતા હોય છે,

આખરે સામાન બાળી તાપી લેતા હોય છે!

મહેલના ભંડારમાંથી પણ મળે ના તત્ત્વ જે,

બાળકો એ ધૂળમાંથી શોધી લેતા હોય છે!

ચાંદ, સૂરજ, નક્ષત્રો, આકાશગંગા ને ગ્રહો,

ઓલિયા તો બેઠા-બેઠા સ્પર્શી લેતા હોય છે.

હોય ટીપું કે સમંદર, ફર્ક એને શું પડે?

હો ગજું એ તો ગમે ત્યાં ડૂબી લેતા હોય છે

એટલે મંદિર જવાનીયે જરૂર પડતી નથી,

એના ઘર સામે આ ચરણો થંભી લેતા હોય છે.

આમ જુઓ તો નથી હોતી કમી અજવાસની,

માણસો અંધારને ખુદ સર્જી લેતા હોય છે.

પૂછતાં નહીં એના ચહેરાની ચમકના કારણો,

એ તો કાયમ આંસુઓમાં નાહી લેતા હોય છે.

સારું છે કે તારા ધરતીથી ધણાંયે દૂર છે,

માણસો કંઈ પણ ખરીદી વેચી લેતા હોય છે.

jindgiine ae rite pan jiivii letaa hoy chhe