રેખ્તા
હિન્દવી
સૂફીનામા
રાજસ્થાની
ઝાંઝવા ધસશે ધસારાબંધ તો?
(ને) તોડશે એ પાંપણોના બંધ તો?
આંખમાંથી આંસુઓ લૂછો નહીં
તૂટશે પેલો ઋણાનુંબંધ તો?
શ્વાસમાં છલકાય છાની ગંધ તો?
ને બધે ચર્ચાય આ સંબંધ તો?
કંઠથી છટક્યો ટહુકો મોરનો
ડાળ પરથી એ મળે અકબંધ તો?
તું જવાનો દિન મુકરર કર અને
ચાલવા પર આવશે પ્રતિબંધ તો?
હું ક્ષણોના મ્હેલમાં જાઉં અને
કોક દરવાજો કરી દે બંધ તો?
સ્રોત
- પુસ્તક : ઇર્શાદ (પૃષ્ઠ ક્રમાંક 1)
- સર્જક : ચિનુ મોદી
- પ્રકાશક : રન્નાદે પ્રકાશન
- વર્ષ : 2012