જેવી રીતે મોટા ઘરમાં લાગે છે બસ ખાલીપો

જેવી રીતે મોટા ઘરમાં લાગે છે બસ ખાલીપો;

મોટું મન જો રાખું છું તો વાગે છે બસ ખાલીપો.

આડે પડખે પડતાં એણે ચિંતાની ચાદર તાણી;

ઓશિકા પર અરધો-પરધો જાગે છે બસ ખાલીપો.

એના હિસ્સે રાજીપો છે: એવો એનો દાવો છે;

મારો દાવો સાંભળ: ‘મારે ભાગે છે બસ ખાલીપો.’

બેસૂરું આ જીવન આખું, બેસૂરા આ શ્વાસો છે;

બેસૂરી આખી વસ્તીમાં વાગે છે બસ ખાલીપો.

મેં પણ ત્રાગાં કરવાની લત ખોટી પાળી રાખી છે;

તેથી મારી સામે આજે ત્રાગે છે બસ ખાલીપો.

jewi rite mota gharman lage chhe bas khalipo