જેણે મારી નથી ફિકર રાખી

જેણે મારી નથી ફિકર રાખી,

એની પર મેં સદા નજર રાખી.

આવતી કાલ શું ભલું કરશે,

આજની જો નથી ખબર રાખી.

એ જ કરશે શરાબની તારીફ,

પ્યાલી જેણે પીધા વગર રાખી.

એનાં દુઃખો અનંત રહેવાનાં,

જેણે સુઃખમાં નથી સબર રાખી.

ઉન્નતિ ચૂમશે કદમ એનાં,

જેણે દૃષ્ટિ સદા ઉપર રાખી.

નાવ જીવનની ક્યાં લઈ જશે,

જેણે હેતુ વગર સફર રાખી.

જિંદગી એ ખુદાને શોધે છે,

પાયમાલીથી જેણે પર રાખી.

આ ઉતાવળ શી આટલી 'મોમિન'

મોત પહેલાં તેં ક્યાં કબર રાખી.

jene maarii nathii fikar raakhii