જગતમાં આપનાથી ક્યાં કોઈ સારી હવેલી છે

જગતમાં આપનાથી ક્યાં કોઈ સારી હવેલી છે,

પરંતુ કેમ એને ત્યાં હવા ઉપર ચણેલી છે?

મને સમજાય એ પહેલા એ સમજી જાય છે વાતો,

કે મારી લાગણી મારાથી બહુ સારું ભણેલી છે.

તરત ઊભા જ થઈને ચાલતી પકડી, ના રોકાયો,

પવન પર વિશ્વને ઘમરોળવાની ધૂન ચડેલી છે.

તને જોયાની ઘટના યાદ પણ ના સ્પષ્ટ એવી કંઈ

તને જોયા પછીથી આંખમાં ઝાંખપ વળેલી છે.

બનાવું છું દિવસભર જાતને, સાંજે જતો તૂટી,

આ કોણે સાદડી ગુંથી અને પાછી ઊકેલી છે.

jagatman apnathi kyan koi sari haweli chhe