રેખ્તા
હિન્દવી
સૂફીનામા
રાજસ્થાની
લાગણીવશ હાથમાંથી જડભરત પાસો પડ્યો
બંધ મુઠ્ઠી ખોલવાનો ભય ફરી સાચો પડ્યો.
હું અરીસો ધારીને જોવા ગયો મારી છબી
આ ચમકતી ભીંત પર તો કાળો પડછાયો પડ્યો.
આમ તો પર્યાપ્ત છે બે આંખનો વિસ્તાર પણ
પૂર આવેલી નદીને પટ ઘણો નાનો પડ્યો.
મોગરાની મ્હેંકમાંથી છૂટવાના યત્નમાં
હોશમાં આવ્યો ન આવ્યો, ઘેનમાં પાછો પડ્યો.
આ રિયાસતમાં હવે ‘ઇર્શાદ’ વટ શું રાખવો?
બારી કાપી દૃશ્ય જડવાનો જ જ્યાં ધારો પડ્યો?
(ઓક્ટો.’૭૮,મે’૧૧)
સ્રોત
- પુસ્તક : ઇર્શાદ (પૃષ્ઠ ક્રમાંક 39)
- સર્જક : ચિનુ મોદી
- પ્રકાશક : રન્નાદે પ્રકાશન
- વર્ષ : 2012