રેખ્તા
હિન્દવી
સૂફીનામા
રાજસ્થાની
ચાહીશ કિન્તુ મળવાની ઈચ્છા નહીં કરું
માળા જપીશ, પુષ્પથી પૂજા નહીં કરું.
દુઃખોય સાથે મહારો કદી છોડશે નહીં,
પોતીકાંઓને હુંય પરાયાં નહીં કરું.
સૂરજની જેમ હું ય કદીક આથમી જઈશ;
ઘર-ઉંબરે કે ટોડલે દીવા નહીં કરું.
શ્રાવણમાં સાંપડી છે સજા અશ્રુપાતની;
પાણી મૂક્યું કે હું ફરી ટહુકા નહીં કરું.
કોરી કિતાબ જેવી છે આ જિંદગી હવે;
પત્રો લખીશ, બંધ લિફાફા નહીં કરું.
ત્હારી કનેથી કોઈ વચન માગવું નથી;
છે લાગણી તો એની પરીક્ષા નહીં કરું.
મ્હારા ખભા ઉપર છે બધાં મ્હારાં પુણ્ય-પાપ;
ઈશ્વર કનેય કોઈ ખુલાસો નહીં કરું.
સ્રોત
- પુસ્તક : વયઃસંધિ (પૃષ્ઠ ક્રમાંક 65)
- સંપાદક : બાપુભાઈ ગઢવી
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2002