ઈશ્વર જેવું બ્હાર નથી ને, કોના તું આ જાપ જપે છે.

દેખાતો આકાર નથી ને, કોના તું આ જાપ જપે છે.

જાણ થશે તો આંખ ઊઘડશે, એવું લાગ્યા કરતું કાયમ,

થાતો બેડો પાર નથી ને, કોના તું આ જાપ જપે છે.

જાત જગાડી, ખુદથી પહેલા વાત કરી લે, રસ્તો જડશે,

થોડો પણ વહેવાર નથી ને, કોના તું આ જાપ જપે છે.

અંધારામાં બેસી રહીને કેમ કરી મોતી પ્રોવાશે?

વીજ તણો ઝબકાર નથી ને, કોના તું આ જાપ જપે છે.

નેણ-નાકના તરભેટા પર આથડતું એ ચકળવકળ થઈ,

મન ટકતું પળવાર નથી ને, કોના તું આ જાપ જપે છે.