મૌલવીના ગામ વચ્ચે મય પીવાનું મન થયું

મૌલવીના ગામ વચ્ચે મય પીવાનું મન થયું,

આ તમારા પુણ્યને પડકારવાનું મન થયું.

સાવ ચીંધરેહાલ આખી જિંદગી ભટક્યા કર્યું,

આખરી ક્ષણને હવે શણગારવાનું મન થયું.

ચાંદ-સૂરજનું ગ્રહણ થાતું રહે છે એટલે,

તારલાની જેમ અમને જીવવાનું મન થયું.

જોખમી દાવો લગાવ્યા કાળના જુગારમાં,

ને હવે જીતેલ બાજી હારવાનું મન થયું.

આયનામાં ખુદને મળવાની ઘણી ઇચ્છા હતી;

લ્યો, મળ્યા તો કેમ આંસુ સારવાનું મન થયું?

maulvinaa gaam wachche maya pivaanun man thayun