રેખ્તા
હિન્દવી
સૂફીનામા
રાજસ્થાની
હોઈયેં ત્યાં જ ઝળહળિયેં!
hoiyen tyan ja jhalahaliyen!
રાજેન્દ્ર શુક્લ
રાજેન્દ્ર શુક્લ
એક ને એક જ સ્થળે મળિયેં અમે,
હોઈયેં જ્યાં ત્યાં જ ઝળહળિયેં અમે,
પિંડ ક્યાં પેટાવવા પળિયેં અમે?
હોઈયેં જ્યાં ત્યાં જ ઝળહળિયેં અમે.
હેત દેખીને ભલે હળિયેં અમે
હોઈયેં જ્યાં ત્યાં જ ઝળહળિયેં અમે,
પાંચ ભેળાં સાવ શેં ભળિયેં અમે,
હોઈયેં જ્યાં ત્યાં જ ઝળહળિયેં અમે.
ઊભરાવું હોય તો શમવું પડે,
ઊગિયેં જો તો જ આથમવું પડે
મેરુ ચળશે પણ નહીં ચળિયે અમે,
હોઈયેં જ્યાં ત્યાં જ ઝળહળિયેં અમે.
કૈંક સમજ્યા ત્યારથી બેઠા છિયેં,
હાથમાં હુક્કો લઈ આ ઢોલિયે
કયાંથી મળિયેં કોકને ફળિયે અમે,
હોઈયેં જ્યાં ત્યાં જ ઝળહળિયેં અમે.
શબ્દના દીવા બળે છે ડેલિયે,
આવતલ આવી મળે છે ડેલિયે,
સ્વપ્ન જેવું શીદ સળવળીયેં અમે,
હોઈયેં જ્યાં ત્યાં જ ઝળહળિયેં અમે!
સ્રોત
- પુસ્તક : ગુજરાતી ઊર્મિકાવ્યો (પૃષ્ઠ ક્રમાંક 100)
- સંપાદક : જયન્ત પાઠક, રમણલાલ પાઠક
- પ્રકાશક : આદર્શ પ્રકાશન
- વર્ષ : 1983