ઘરનાં તો જોકે વાસી દીધેલાં કમાડ છે

ઘરનાં તો જોકે વાસી દીધેલાં કમાડ છે,

જોવી જ હો દશા તો ભીંતોમાં તિરાડ છે.

અશ્રુ પછીનાં સ્મિતનું આ દૃશ્ય તો જુઓ,

વર્ષા પછીનો જાણે કે પહેલો ઉઘાડ છે.

બળતી બપોરે રણમાં બીજું તો શું સાંભરે?

આવે છે યાદ એ જે બગીચામાં ઝાડ છે.

લેવો જ પડશે મારે બુલંદીનો રાહ પણ,

કારણ કે આંખ સામે દુઃખોનો પહાડ છે.

આ સુખનાં સોણલાં એ ફકત સોણલાં નથી,

મારા ભવિષ્યમાંથી કરેલો ઉપાડ છે.

મરનારનાંય જૂથ જુદાં હોય છે અહીં,

'બેફામ' એટલે તો કબર ફરતી વાડ છે.

Ghar Na To Joke Vasi Didhela Kamad Chhe