કહેતા જે દાદી વારતા એવી પરી છે દોસ્ત

કહેતા જે દાદી વારતા એવી પરી છે દોસ્ત,

આંખોમાં એની યાદની મહેફિલ ભરી છે દોસ્ત.

હાથે કરીને મેં જ તો ખોયા છે એમને,

રેખા મેં એવી હાથ મહીં ચીતરી છે દોસ્ત.

પાદરની ભીની મહેકથી ભીનો હજીયે છું,

ખળખળ નદી આ લોહીની નસમાં ભરી છે દોસ્ત.

એઓ ખરા છે, આમ તો, એ તો, કબૂલ પણ,

મારીય વાત આમ જુઓ તો ખરી છે દોસ્ત.

રસ્તા ગલી કે શેરીનાં વળગણ ગયાં છે ક્યાં?

તડકાની જેમ ચાંદની પીધા કરી છે દોસ્ત.

‘કૈલાસ’ એને ભૂલવું સંભવ નથી છતાં,

ભૂલી જવાની આમ તો કોશિશ કરી છે દોસ્ત.

kaheta je dadi warta ewi pari chhe dost