રેખ્તા
હિન્દવી
સૂફીનામા
રાજસ્થાની
રતિલાલ 'અનિલ'
પગલાં પૂજાય એવું ગમન હોવું જોઈએ;
સમજાય છે કે કેવું જીવન હોવું જોઈએ!
પ્હોંચી શકાય ત્યાં ન ભલે - એનો ગમ નથી,
દૃષ્ટિ સામે નિત્ય ગગન હોવું જોઈએ!
આવે છે એવી કોઈના વ્યક્તિત્વની સુવાસ;
લાગે છે આસપાસ સુમન હોવું જોઈએ!
આઘાં છતાંય પાસ દીસે છે ધરા-ગગન;
કે' છે. ક્ષિતિજ : આવું મિલન હોવું જોઈએ!
થાક્યો નથી. છતાંય કદમ કાં ન ઊપડે?
આંહીં જ ક્યાંક એનું સદન હોવું જોઈએ!
સમજાતું નથી કેમ મને મારું આ જીવન?
એ ખૂબ સરળ યા તો ગહન હોવું જોઈએ!
સમજી ભલે શકાય ના ખુલ્લી જીવન-કિતાબ;
મનમાં સદાય એનું મનન હોવું જોઈએ.
વેરાનમાં રહીશ, મને એનું દુઃખ નથી;
પણ આસપાસ ક્યાંક સુમન હોવું જોઈએ!
મંજૂર હોય સર્વને મારો જીવન-પ્રકાશ,
ચમકી શકું હું એવું ગગન હોવું જોઈએ.
ક્યારેક જોઉં છું અહીં ઝાકળ છવાયેલું,
મન ચ્હાયઃ મારું આવું કફન હોવું જોઈએ.
ઇચ્છા, જગતને પાર જવા થાય કાં 'અનિલ'?
વાસ્તવમાં એ જ મારું વતન હોવું જોઈએ!
સ્રોત
- પુસ્તક : મધુવન (પૃષ્ઠ ક્રમાંક 207)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન, રાજકોટ
- વર્ષ : 2002
- આવૃત્તિ : 4