એવું નથી કે તેઓ કશું આપતા નથી

એવું નથી કે તેઓ કશું આપતા નથી;

પણ માગું કંઈ હું એવું ગજું આપતા નથી.

છે શાંત જળના જેવી ફક્ત ચુપકીદી સતત,

સંકેત એથી કોઈ વધુ આપતા નથી.

ગોપિત નિષેધ કોઈ નશાની લગાડી લત,

એ મારા હકનું કાંઈ છતું આપતા નથી.

જો દૂર હો તો આપે છે મબલક ફરી ફરી,

ને હોય જો નજીક તો તસુ આપતા નથી.

એ સાચવી તો લે છે સપાટી ઉપર મને,

ઊંડે જો હું જઉં તો ચરુ આપતા નથી.

પગતાણથી બિછાવે છે શબ્દોને વાતમાં,

પણ છંદ તંગ હો તો લઘુ આપતા નથી.

મારું વજૂદ ગજવે એ નાખી હરેફરે,

અમથું જ લઈ ગયા’તા હજુ આપતા નથી.

ewun nathi ke teo kashun aapta nathi