એક પળ આવ્યા ને આવીને તમે ચાલ્યા ગયા

એક પળ આવ્યા ને આવીને તમે ચાલ્યા ગયા,

દર્દની સોગાત આપીને તમે ચાલ્યા ગયા.

નામ દો, કોણે કહ્યું તમને કે હું ઘરમાં નથી,

આંગણેથી કોને પૂછીને તમે ચાલ્યા ગયા.

મેં બુઝાતા કોડિયાની વાટ સંકોરી હતી,

ને અચાનક ફૂંક મારીને તમે ચાલ્યા ગયા.

સ્હેજમાં તૂટી ગયું સ્વપ્નું ઉઘાડી આંખનું,

મેં જરાકેક આંખ મીંચી ને તમે ચાલ્યા ગયા.

ચાર દિનની સાવ ટૂંકી જિન્દગીમાં પણ ખલીલ!

કેવો લાંબો પંથ કાપીને તમે ચાલ્યા ગયા.

Ek Pal Aavya Ne Aavine Tame Chalya Gaya