એક ગેસ્ટાલ્ટ ગઝલ

એક ગેસ્ટાલ્ટ ગઝલ

આમ જુઓ તો કાંઈ નહીં ને આમ જુઓ ચ્હેરાં

આમ જુઓ તો માણસ લાગે આમ જુઓ તો મ્હોરાં

આમ જુઓ તો ઘેઘૂર આંખો આમ નજરની વર્ષા

આમ જુઓ તો બેઉ લથબથ આમ જુઓ તો કોરાં

અમે આંખથી પીધાં તમને તમે હવે ઘટઘટમાં

આમ જુઓ તો જોજન આઘાં આમ જુઓ તો ઓરાં

દર્પણ થઈને ઝીલી રહ્યાં છો શ્યામ અમારી છાયા

આમ બન્યાં કૈં વાને ભીનાં આમ તમે છો ગોરાં

આજ સમય પણ લોહીસોંસરો વરસે એવા લયમાં

આમ જુઓ તો તડકો તડકો આમ જુઓ તો ફોરાં

આમ જુઓ અકબંધ અકબંધ આમ જુઓ તો દોરા

આમ જુઓ તો જીવતર મીઠાં આમ જુઓ તો ખોરાં

રસપ્રદ તથ્યો

ગેસ્ટાલ્ટ ગઝલ - એક એવી રમતીયાળ ચિત્રસંયોજના કે દૃષ્ટિને અમુક બીબામાં ઢાળતાં એક છબી અને અમુકમાં ઢાળતાં બીજી છબી પ્રગટ કરે.

Ek Gestalt Ghazal