એક ગમતું નામ ભૂલી જાઉં એવો કોઈનો આદેશ છે

એક ગમતું નામ ભૂલી જાઉં એવો કોઈનો આદેશ છે,

ને વ્યથામાં સાવ ડૂબી જાઉં એવો કોઈનો આદેશ છે.

આગ હું ચાંપું પ્રથમ રંગોભરી મુજ સ્વપ્નની નગરી મહીં,

ને પછી એમાં જ કૂદી જાઉં એવો કોઈનો આદેશ છે.

ક્યાં રજા છે આગવો એક્કેય યારો, શ્વાસ લેવાની મને;

પૂર્વજોની રીત ઘૂંટી જાઉં એવો કોઈનો આદેશ છે.

કોઈ મારી વેદના સમજે ન સમજે, ગૌણ એ બાબત ગણી,

હું બધાના આંસુ લૂછી જાઉં એવો કોઈનો આદેશ છે.

આ પરિચિત માર્ગ પરથી સાવ છેલ્લી વાર જ્યારે નીકળું,

ના અહીં પગલુંય મૂકી જાઉં એવો કોઈનો આદેશ છે.

ek gamatun nam bhuli jaun ewo koino adesh chhe