એક દિલ દોર્યું અને મેં 'તું' લખ્યું

એક દિલ દોર્યું અને મેં 'તું' લખ્યું!

પાંપણો પર એ પછી 'આંસુ' લખ્યું!

એ તરફની મૌસમોની શું ખબર!

આ તરફ તો રોજ ચોમાસુ લખ્યું.

કંઈ લખાઈ ના શક્યું એ પળ વિશે;

જિંદગીભર આમ તો ખાસ્સું લખ્યું!

એમ લાગે છે હથેળી જોઈને;

ભાગ્યમાં જાણે કશું ન્હોતું લખ્યું.

વૈદ્યના અક્ષરસમા છે અક્ષરો;

કેમ વાંચું? આંખમાં તે શું લખ્યું?

એક ચાદર પર લખ્યું કે રાત છે;

એક તકિયા પર અમે સપનું લખ્યું!

જેટલું તારા ઉપર લખતો રહું;

એમ લાગે કે 'અગન' ઓછું લખ્યું!

ek dil doryun ane men 'tun' lakhyun