એના ઘરની એક બારી મારા ઘર સામે હતી

એના ઘરની એક બારી મારા ઘર સામે હતી,

મારી જે દુનિયા હતી મારી નજર સામે હતી.

એકસરખો ગર્વ બંનેને હતો વ્યક્તિત્વનો,

એક ઊંડી ખીણ પર્વતના શિખર સામે હતી.

રાતે ચિંતા કે સવારે સૂર્ય કેવો ઊગશે,

ને સવારે સાંજ પડવાની ફિકર સામે હતી.

હું વસંતોને ઉમળકાભેર વળગી લેત પણ,

હાય રે! એક વેંત છેટે પાનખર સામે હતી.

હું જ અંધારાના ડરથી આંખ ન ખોલી શક્યો,

એક સળગતી મીણબત્તી રાતભર સામે હતી.

મિત્ર ને શત્રુની વચ્ચોવચ ખલીલ ઊભો હતો,

એક આફત પીઠ પાછળ એક નજર સામે હતી.

ena gharni ek bari mara ghar same hati