અલગ ઓળખ બનાવીને અડીખમ આજ ઊભી હું.

અહીં લગ પહોંચવામાં તો હજારો વાર તૂટી હું.

દુઃખોને તાળું મારી, ચાવી ફેંકી, નીકળી ગઈ'તી;

પછી એવું થયું કે, એ જ દિવસે ટ્રેન ચૂકી હું.

બહુ સખ્તાઈપૂર્વક કહી દીધું કે, રોંગ નંબર છે.

ખબર ક્યાં એને પડવાની? રડી 'તી ફોન મૂકી હું.

હતું ઑફિસમાં મહિલા દિવસનું ખાસ આયોજન,

ઘરે બીમાર મા ને આજે પાછી લે'ટ છૂટી હું.

હવે તો ગામ આખું ત્યાંથી પીશે નહિ કદી પાણી,

બિચારી સ્ત્રીઓ જાણે છે, કૂવામાં કેમ કૂદી હું!

તબીબે કીધું છે, બીમારી બહુ ગંભીર છે મારી;

અને પાછી ફરી ગઈ છું દવાનો ભાવ પૂછી હું.