રેખ્તા
હિન્દવી
સૂફીનામા
રાજસ્થાની
અગમ પાલનપુરી
ધુમ્મસ ઢળેલ અશ્વ સવારોના શ્હેરમાં,
શું સૂર્યનો દમામ વિકારોના શ્હેરમાં!
સજ્જડ કમાડ જેમ ટકોરાય સૌ અહીં,
કૈં પણ સુણે ન કોઈ પુકારોના શ્હેરમાં!
આંખોનાં આંસુએ જ ઠરે વિશ્વ-દેવતા!
ડૂબે તરસતો સૂર્ય તુષારોના શ્હેરમાં.
તૂટી પડે બધાં જ પછી રક્ત-રાત પર;
ભીંસાઈ જાય સૂર્ય કતારોના શ્હેરમાં.
હું શું કહું કશુંય; ‘ફરે તે ચરે’... વિશે!
લૂંટાઈ પણ જવાય લટારોના શ્હેરમાં!
નામે નફો અનંગ નજરના નગે નગે,
સૌ સ્વાર્થના ગુલામ બજારોના શ્હેરમાં!
ખુદ ચોટને જ ચોટ દિલે વાગતી રહે,
પથ્થર સુધી થવાય પ્રહારોના શ્હેરમાં.
હું એકલો, બધાં મને પરછાઈ પૂરતાં,
અળગો જ ઓળખાઉ હજારોના શ્હેરમાં!
ઇન્સાન વિણ કશું નહીં, ઇન્સાન કૈ નહીં!
સળગ્યા કરે મસાણ... મઝારોના શ્હેરમાં.
હું હાસ્ય ખડખડાટ સડક જેમ પાધરો -
લોહીલુહાણ દર્પણી દ્વારોના શ્હેરમાં!
કડવાં કુરૂપ દૃશ્ય 'અગમ' ઑર ખિલખિલે,
દિલ-દર્શ દિલખુશાલ વિહારોના શ્હેરમાં.
સ્રોત
- પુસ્તક : ગુજરાતી પ્રતિનિધિ ગઝલો (પૃષ્ઠ ક્રમાંક 1)
- સંપાદક : ચિનુ મોદી
- પ્રકાશક : સાહિત્ય અકાદેમી
- વર્ષ : 2008
- આવૃત્તિ : ત્રીજી આવૃત્તિ