ધરાનું બીજ છું તો પણ ફસલમાં આવું તો કે’જે

ધરાનું બીજ છું તો પણ ફસલમાં આવું તો કે’જે;

નિકટ હોવા છતાં તારી નજરમાં આવું તો કે’જે.

સમયથી પર થઈને હું ક્ષિતિજની પાર બેઠો છું,

દિવસ કે રાતના કોઈ પ્રહરમાં આવું તો કે’જે.

બદલતી ભાવનાઓ ને પરાકાષ્ઠા છે સર્જનની,

હું કોઈની કે ખુદ મારી અસરમાં આવું તો કે’જે.

જો આવીશ તો ફક્ત આવીશ ઇજનના ભાવને લઈને,

વિવશતા કે વ્યથારૂપે ગઝલમાં આવું તો કે’જે.

મને મળવા ચીલાઓ ચાતરીને આવવું પડશે,

હું કોઈ પંથ કે કોઈ ડગરમાં આવું તો કે’જે.

પરમ તૃપ્તિને પામીને હવે છું મુક્ત મારાથી,

નદીની વાત કે જળની રમતમાં આવું તો કે’જે.

તું જોજે ફાંસની જેમ જ ખટકવાનો છું છેવટ લગ,

કદી હું ક્યાંય લોહીની ટશરમાં આવું તો કે’જે.

dharanun beej chhun to pan phasalman awun to ke’je