તમારી આંખમાં ઝરણું છે, દરીયો છે, કૂવો પણ છે!

ને એમાં ડૂબવાને એક જણ તત્પર ઊભો પણ છે!!

બધાને કોણ જાણે કેમ મગ ચોખા જ દેખાતા!

નહીં તો વારતામાં તો ચકી પણ છે ચકો પણ છે!!

સમય સિક્કાની જેમ જ માણસોને પણ ઉછાળે છે!

કદાચ એથી જ માણસ ક્યાંક ઉંધો છે સીધો પણ છે!!

ભૂમિતિ છોડને ભઇલા! નહીં એ જીવતાં શીખવે!

જીવન વર્તુળ જેવું છે છતાં એમાં ખૂણો પણ છે!!

જુદા પલ્લામાં જો એ હોત, તો ચિંતા હતી કૈં કયાં?

ભરોસો છે જે પલ્લામાં એ પલ્લામાં દગો પણ છે!!